Hvað þarf að hafa í huga þegar farið er í gegnum öryggisleit?
Eftir að þú hefur innritað þig ferðu upp á 2. hæð í öryggisleitina en fyrst þarftu að fara í gegnum aðgangsstýringarhlið með því að skanna brottfararspjaldið.
Allur vökvi þarf að vera í sérstökum glærum plastpoka sem hægt er að loka og má hver eining í pokanum vera 100 millilítrar eða minna. Heildarmagnið í pokanum þarf að vera undir einum lítra. Þú getur fengið plastpoka fyrir vökvann áður en þú ferð í gegnum öryggisleit. Farþegar mega hafa rafsígarettur meðferðis og taka þær með í handfarangri (ekki í innrituðum farangri).
Allur innritaður farangur fer í gegnum röntgenskoðun. Ef nauðsyn krefur, gæti þurft að opna töskur til frekari skoðunar. Pakkaðu farangrinum þínum vandlega til að auðvelda skoðun og koma í veg fyrir að innihald detti út. Ekki er tekin ábyrgð á hlutum sem falla úr farangri við þessar aðstæður.
Athugið!
Ef hlutir sem ekki má hafa meðferðis finnast í handfarangri verður þér boðið að innrita hlutina ef þeir uppfylla flugreglur. Ekki er hægt að geyma bannaða hluti á Keflavíkurflugvelli.
Hvað fer í skönnunarbakka?
- Vökvi: Plastpokinn með vökvunum.
- Raftæki: Fartölvur, símar, spjaldtölvur, snjallúr og stærri raftæki.
- Persónulegir hlutir: Belti, yfirhafnir og skór. Mikilvægt er að tæma alla vasa áður en farið er í gegnum öryggishlið.